“Цусны цагаан эсийн хорт хадвар” туссан зургаан настай Б.Тэмүүлэн хүүгийн хандивын аян амжилттай өрнөсөн. Хүүгийн аав ээж Сүхбаатарын талбайд мэдээлэл хийж, ард түмнээсээ тусламж хүссэн бөгөөд ард түмнээс хоёр өдрийн дотор эмчилгээний зардал цугласан билээ. Тэгвэл Н.Батзул гэр бүлийн хамт өнөөдөр өглөө хүүгийнхээ эмчилгээг хийлгэхээр Турк улсыг зорилоо. Тэдний алтан шар зам өлзийтэй байж, хүүгээ эдгээгээд ирэх ерөөл өргөж байна.
Б.Тэмүүлэн хүүгийн аав Н.Батзул хэлэхдээ “Хоёр өдрийн хугацаанд бидний төсөвлөсөн хүүгийн минь эмчилгээний зардал 570 сая төгрөг цуглаж зуун хувь бүрдсэн. Биднийг дэмжиж тусалсан нийт Монголын ард түмэндээ болон мэдээллийг түгээж өгсөн хэвлэл мэдээлийн байгууллагууд, цахим сайтууддаа маш их баярлаж байна. Монголын ард түмэндээ маш их баярлалаа. Та бүхний минь гэгээн цагаан үйл үеийн үед дэлгэрч, Монголын минь үрс маш олон болох болтугай гэж ерөөе” хэмээсэн юм.
Б.Тэмүүлэн хүү эмчилгээгээ хийлгэхээр Турк улсыг зорилоо…
