Одоогоос 12 жилийн тэртээ буюу 2001 онд “Овжин охид” хэмээх МУСК дэлгэцнээ гарсан билээ. Тус кино тухайн үедээ цаг үеэ мэдэрсэн, хот хөдөөгийн залуусын зан байдлыг илэрхийлж чадсан, залуусыг сайн сайханд уриалан дуудсан чанартай уран бүтээл болсон хэмээн үзэгчдээс өндөр үнэлгээ авсан байдаг. Өдгөө ч “Овжин охид” үзэгчээ алдаагүйн дээр үнэ цэнэ нь ч буураагүй билээ. Тэгвэл “Овжин охид” маань хаагуур явна вэ? Сэргэлэн, адтай Мишээл охины дүрийг чадварлагаар бүтээсэн жүжигчин Д.Оюунтуул өдгөө хошин урлагийн “Шинэ үе” продакшнд ажиллаж байгаа билээ. Тэрбээр зөвхөн хошин урлагт ажиллаад зогсохгүй 25-р суваг телевизд хөтлөгчөөр ажиллаж телевизийн салбарт хүч сорьж, чамгүй сайн хөтлөгч болохоо харуулаад амжсан.
Түүнчлэн телевизийн олон ангит “Ханилсанаас илүү амраг” кинонд гол дүр бүтээсэн билээ. Мөн 10 гаруй кинонд дуу оруулж амжсан байна. Ийнхүү алаг нүдэн Мишээл маань амжилттай гялалзаж явна. Сонирхуулахад, Мишээлийн дүрийг оюутны ширээнээс дөнгөж босоод л бүтээсэн билээ. Харин Сарнайгийн дүрийг бүтээсэн жүжигчин маань Монголын сайхан бүсгүй өргөмжлөлт, мисс Т.Уянгалянхуа билээ. Хотын охины дүрийн чамгүй сайн бүтээж, авъяасаа үзүүлээд амжсан. Үзэгчид түүнийг Сарнайгийн дүрд тохирсон, дүрээ ч сайн гаргаж чадсан хэмээн дүгэнэсэн билээ. Мисс Т.Уянгалянхуа “Макс” группын ерөнхийлөгч Д.Ганбаатарын гэргий бөгөөд гурван хүүхдийн ээж болж жаргалтай амьдарч байна. Харин Үүрцайхын дүрийг Э.Саранцэцэг хэмээх жүжигчин бүсгүй бүтээсэн байдаг. Тэрбээр нэлээд эршүүд, хэрсүү охины дүрийг чадамгай бүтээсэн билээ.
